ന്യൂഡൽഹി:എൻജിനീയറിംഗ് പ്രവേശന പരീക്ഷയായ ജെ ഇ ഇ മെയിൻ ഫലം പ്രഖ്യാപിച്ചു. 44 പേർക്ക് നൂറു ശതമാനം മാർക്ക് ലഭിച്ചു. 18 വിദ്യാർഥികളാണ് ഒന്നാം റാങ്കിന് അർഹരായത്.
ഒന്നാം റാങ്കുകാരിൽ കേരളത്തിൽനിന്ന് ആരുമില്ല. jeemain.nta.nic.in എന്ന വെബ്‌സൈറ്റിൽ ഫലം ലഭ്യമാകും. ബിഇ, ബിടെക്, ബിആർക്ക് കോഴ്‌സുകളിലേക്കുള്ള പ്രവേശനത്തിനായാണ് ജെഇഇ മെയിൻ പരീക്ഷ സംഘടിപ്പിക്കുന്നത്.
ജെഇഇ മെയിൻ സെഷൻ 4 പരീക്ഷകൾ ആഗസ്റ്റ് 26, 27, 31, സെപ്റ്റംബർ 1, 2 തീയതികളിലായിട്ടാണ് നടന്നത്. പരീക്ഷയുടെ ഉത്തരസൂചിക കഴിഞ്ഞദിവസം വെബ്‌സൈറ്റിൽ അപ്‌ലോഡ് ചെയ്തിരുന്നു. ജെഇഇ മെയിൻ 2021 ഫലം പ്രഖ്യാപിക്കുന്നത് അന്തിമ ഉത്തരസൂചികയുടെ അടിസ്ഥാനത്തിലാണ്.
സ്‌കോർ പുനർമൂല്യനിർണയം/പുന പരിശോധന എന്നിവയ്‌ക്ക് വ്യവസ്ഥയില്ല. ഇതുമായി ബന്ധപ്പെട്ട ഒരു കത്തിടപാടുകളും സ്വീകരിക്കില്ല. വിദ്യാർത്ഥികൾക്ക് സ്‌കോർ/റാങ്ക് കാർഡുകൾ അയയ്‌ക്കില്ല. പകരം ജെഇഇ (മെയിൻ) വെബ്‌സൈറ്റിൽ നിന്ന് സ്‌കോർ/റാങ്ക് കാർഡുകൾ ഡൗൺലോഡ് ചെയ്യണം.
