ഇടുക്കി: മറയൂരിൽ ആത്മഹത്യയ്‌ക്ക് ശ്രമിച്ച കമിതാക്കളിൽ യുവാവ് മരിച്ചു. പെരുമ്പാവൂർ സ്വദേശി നാദിർഷയാണ് മരിച്ചത്. കൈ ഞരമ്പ് മുറിച്ച നിലയിൽ സ്വകാര്യ ആശുപത്രിയിൽ പ്രവേശിപ്പിച്ച യുവതിയുടെ നില അതീവ ഗുരുതരമാണ്. സുഹൃത്തുക്കൾക്ക് വീഡിയോ അയച്ച ശേഷമായിരുന്നു ആത്മഹത്യാശ്രമം. മരിക്കാൻ തീരുമാനിച്ചാണ് ഇരുവരും മറയൂരിലേക്ക് എത്തിയതെന്നാണ് പോലീസ് നൽകുന്ന വിവരം.
നാദിർഷയും മറയൂർ ജയ്മാതാ സ്‌കൂളിലെ അദ്ധ്യാപികയായ നിഖിലയും ഏറെ നാളായി സ്‌നേഹത്തിലായിരുന്നു. ഇതിനിടെ നാദിർഷയ്‌ക്ക് വേറെ വിവാഹം ഉറപ്പിച്ചു. തുടർന്ന് ഇരുവരും ആത്മഹത്യ ചെയ്യാൻ തീരുമാനിക്കുകയായിരുന്നു. മറയൂർ കാന്തല്ലൂർ റൂട്ടിൽ വണ്ടി നിർത്തി സുഹൃത്തുക്കൾക്ക് വീഡിയോ ഷൂട്ട് ചെയ്ത് അയച്ചു കൊടുത്തു. ശേഷം കൈ ഞരമ്പ് മുറിച്ച ശേഷം കാന്തല്ലൂർ ഭ്രമരം വ്യൂ പോയിന്റിൽ നിന്നും കൊക്കയിലേക്ക് ചാടുകയായിരുന്നു.
പ്രദേശത്ത് എത്തിയ വിനോദ സഞ്ചാരികളാണ് പാറപ്പുറത്ത് കിടക്കുന്ന യുവതിയെ കണ്ടെത്തിയത്. തുടർന്ന് നാട്ടുകാരും പോലീസും നടത്തിയ തിരച്ചിലിൽ നാദിർഷയേയും കണ്ടെത്തി. അവശനിലയിലായ നിഖിലയെ മൂന്നാറിലെ ആശുപത്രിയിൽ പ്രവേശിപ്പിച്ചു. പോലീസ് അസ്വഭാവിക മരണത്തിന് കേസെടുത്ത് അന്വേഷണം തുടങ്ങിയിട്ടുണ്ട്. നാദിർഷയുടെ മൃതദേഹം പോസ്റ്റുമോർട്ടിത്തിനായി കോട്ടയത്തേയ്‌ക്ക് കൊണ്ടുപോകും.
